اول تاج فى حياتى البلوجريه متمرر من الرقيقة شيرين صاحبت بلوج لحظات التاج بسيط فى اسئلته صعب فى الاجابات وكل المطلوب فى التاج انى اذكر عشر اشياء عن شخصى بس انا حخرج من موضوع العشر اشياء علشان بكره التقيد وحتكلم عن نفسى فى المطلق واحسبو انتو برحتكم
اسمى رانيا فاوى عندى 26 سنه حاصله على ليسانس اداب قسم انجليزى ومفيش شغل بامر الحكومه متزوجه وربنا ادانى يحيى 3 سنوات ويسر سنه لدى من الاشقاء اتنين ايهاب وده الكبير ومحمود الى هو ذاته رئيس جمهوريه نفسى وبعز جدا والدى ووالدتى ودول اول اهتماماتى
بحب جدا الادب بكل انواعه وكتابات يوسف ادريس ويوسف السباعى واحسان عبدالقدوس ونجيب محفوظ واشعار فاروق جويده واحمد فؤاد نجم والابنودى ومن الادب العالمى وليم شكسبير ونشات وترعرت على مغامرات ادهم صبرى ونور الدين محمود وكان نفسى اتجوز واحد منهم
لما كنت بسمع اغانى كنت بحب اسمع نجاه وعبدالحليم حافظ ومحمد منير وحاليا بكتفى باغانى محمد منير الوطنيه وسامى يوسف
بحب الدروس الدينيه للشيخ يعقوب ومحمود المصرى ومحمد حسان وهما بيتكلموا كويس فى الدين بس نفهم صح وبتابع اغلب القنوات الدينينه
مرتبطه جدا باصحابى واحنا مع بعض من ايام الروضه وكل فتره بتنضم لشلتنا عضوه جديده واحدث عضوه فى الشله انضمت واحنا فى ثانويه عامه والحمد لله مازلنا على اتصال ببعض حتى الان
بعشق لحظات الشروق والغروب وبعز هدوء الليل ومصاحبه نجمه بحكى معاها على اللى مش ممكن احكيه لحد
بكره فى حياتى الغباء والكذب ممكن اسامح يحى ابنى فى الغلط بس اعاقبه بشده على الكذب
ماليش اتجاهات سياسيه وفكريه محدده بس الى بحس انه صحى بتبعه او بميل اليه ( اى حاجه ضد الحكومه اكيد صح ) زى مثلا احيانا ممكن اتعاطف مع الاخوان مش كفكر ولكن ككيان مش واخد الفرصه انه يعبر عن رائيه حتى لو اختلفنا مع رائيهم
واخر حاجه انا فعلا ضغطى واطىوبحب الشيكولاته جدا
ثانى حاجه اروح ابلغ الى ادانى التاج انى جاوبت عليه
علم وتم التنفيذ
تانى حاجه مطلوب منى اسلم التاج لخمس افراد وبما انى جديده فى التدوين والرئيس اعتزل يبقى اول خمسه تعليقات هما الى يستلموا التاج
هناك 55 تعليقًا:
هههههههههههه مافيش حد راضى يرد الاول علشان مايتلزقلوش التاج عجبك كدة ؟؟ هههههه , انا الحمد لله لسة رده على تاج شبه دا تمام فمعفاه منه , طبعا عالم التدوين نور بيكى , وبموت فى اسم يحيى اوى على فكرة , ربنا يحفظه , واهم حاجة انى عرفت ليه عنوان مدونتك لأنى كنت مستغرباه جدا , كل تاج وانتى بخير وياما هتخدى من دا كتيررررررر
ههههههههههههه
انا اخدت التاج ده من منى بنفس الطريقه سبحان الله
وبعدين على رأيك اي حاجة ضد الحكومة اكيد صح
وكويس انك فاضيه تقري لوليام شكسبير وفاروق جويده احنا يادوبك نقرى شوية تدوينات والباقي يتكفل بيه الحج ادهم صبري " الا صحيح مين نور الدين محمود ده " احم احم لا لا انا مش جاهل اكيد اديب وله حاجة ههههههه
اجاباتك حلوة وواضح انك شخصية هاديه كده من اجاباتك
اه قبل ماانسى بفكرك ان انا فعلا خدت التاج ده من منى بنفس الطريقه فمتعتبرينيش من ضمن اول خمسه
تحياتي
لاااااااا متقولش محمود اعتزل احنا هنرجعه لعقله ومتزعلنيش بقى يعنى يرضيكى كده ماشى
بس ايه الاعترافات دى عموما انا جاوبته قبلك فى بوست اسمه بنت مصريه عاديه يعنى مش تدبيسينى تانى هههههههههه
عالم البلوجر أكيد اتشرف بأن شخصية جميلة زيك بتكتب فيه يا رانيا
إجابات موفقة في أول تاج ليكي
موافقاكي في كل اللي قلتيه و خصوصا موضوع الاتاهات السياسية..مش ضروري نكون تابعين لناس بعينهم بس المهم نكون مع أي حد يقول كلمة حق
على فكرة أنا كمان خريجة ألسن قسم انجليزي، و معظم الوقت ضغطي واطي "خصوصا في الصييييف" :) و بعشق الشيكولاتة اكتر منك كمان
بس أ كنتنفسي اتجوز شخصية كرتونية :$ و محصلش نصيب :)))
أسامي أولادك جميلة أوي
تحياتي يا جميلة
من الواضح انك اخر حد يجاوب على التاج
انا جاوبت التاج من قبل
اجباتك حلوه واتشرفنا بالتعرف عليكى
تحياتى
انت اخت محمود اهلا بيك
اكيييد هو اللى خلاكى تدخلى عالم التدوين صح
وربنا يخليك زوجك وابنك يسر ويحيى
وانا بقه عكسك انا بحب الشيكولاته جدا بس ضغطى عالى هههههه
تحياتى ولاء
ههههههههههههه انا عندى الضغط على طول انا فاتنى التاج كدة على فكرة اعملى بلوج تانى انا عاوزة تااااااااج
ههههه تسلم الايادى
السلام عليكم
ببساطة شدني الاسم فدخلت التدوينة
وفرحت اوي قولت طالما اميرة الصعيد
يبقي بالفكاكة كدة صعيدية
وانا كمان صعيدية ففرحت اوي
ان الصعايدة هيحتلوا بلوجر
قوليلي بقي استنتاجاتي صح وزلا لأ؟
وعايزة اعرف انتي منين
وردودك علي التاج جميلة وبسيطة
وربنا يخلي لك يحيي
وياريت اشوفك في مدونتي قريب
يا اميرتي
تقبلي خالص تحياتي
السلام عليكم
ما شاء الله عليكي
ربنا يعزك و يكرمك
عجبني أسامي يحيى و يسر
:) ربنا يحميهم يارب
و ألف سلامه من الضغط الواطي
ربنا يحفظك يا جميل
و إن شاء الله الرئيس يرجع تاني
و اللي فيه الخير يكون
:)
إحترامي و حبي
:)
الف مبروك على التاج
لكن انتى فينك انا قولت شكلها راحت فى غيبوبة من الضغط الواطى
الى اقرب لقاء
رازى
زى الهوا
اولا عالم التدوين منور من زمان بيكى وباصحاب الفكر الحر
علي فكره انا صحيح ضغطي واطي بس الحكومه هي السبب الاساسي في انه دايما مش بيتحسن اصل انا كل ما اتنرفز ضغطي يوطا شوفي بقه الحكومه عامله فينا ايه
white heart
الظاهر ان التاج ده كاس وداير عالكل
علي فكره انا مش فاضيه اقرا باستمرار بس باحاول
ونور الدين محمود ده بطل ملف المستقبل بس ايه راجل من الاخر ميتخيرش عن ادهم صبري (انا كنت دايما بغير من مراته سلوي وعشان كده اتجوزت اصلي مستحيل اربط مصيري براجل متجوز هاهاهاها
هاي ابي
لا يا ستي متزعليش انا واثقه ان محمود هيريح اعصابه فتره وهيرجع
واضح ان التاج ده مش ناوي يتوزع انا اللي غلطانه اني موزعتهوش بالامر المباشر
الي فراشه التدوين
دا احنا طلعنا بصره في حاجات كتير
الضغط الواطي واللغه والشيكولاته ويا ترا مين بقه الشخصيه الكرتونيه اصل انا في فتره من حياتي كان نفسي اتجوز كابتن ماجد
ان شاء الله التعارف بينا يكبر ويكون فيه اوجه تشابه اكتر في شخصياتنا
بحبك يا مصر
الظاهر فعلا اني اخر حد يجاوب علي التاج ده
ميرسي علي الزياره
العزيزه ولاء
فعلا محمود هو اللي شجعني ادخل عالم التدوين
اما بالنسبه للضغط العالي فقلبي عندك بس عليكي وعلي الكركديه الساقع
الاميره بيري
بالنسبه للضغط فواضح انه من سمات الجيل هاهاها
وبالنسبه للتاج يا جميل فواضح انه من نصيبك اصل في 3 اعتزروا في الاول علشان مجاوبينه
اديني محرمتكيش من حاجه
العزيزه روز
ايوه يا ستي انا صعيديه وشعاري صعيدي يا بوي علي حق صعيدي واقول الحق
انا يا روز العزيزه من محافظه قنا
انشاء الله هنكون اصحاب
القادم اجمل
ان شاء الله القادم هيكون اجمل بس بعد ما تتغير الحكومه
وزي ما وضحت ل ابي محمود محتاج فتره يريح اعصابه
رازي كبير هواره
انا مارحتش في غيبوبه بس كنت علي وشك وربنا ستر ربنا ما يحكم عليك
بجد حلو قوى انك مع اصحابك من ايام الروضه
لاء وكمان بينضم اعضاء جدد ليكم بسم الله ماشاء الله
يارب تفضلوا مع بعض دايما
ويخليلك ولادك
تحياتى
عزيزتى رانيا
اجابتك بتبين قد ايه شخصيتك جميله اوى
وانا بحب كل من ذكرتيهم من ادباء وفنانين
ربنا يخللى لك اولادك ويفرحك بهم يارب
وسلامى الكبير اوى اوى لمحمود اللى بتمنى ان تكون معنوياته افضل وبلغيه انى حاانظم مظاهره لرجوعه.
ربنا يكرمك ويسعدك انتى واسرتك
خالص حبى وتقديرى
ra7eel
عارفه انا صاحبتي الانتيم مش من ايام الروضه بس لا دي معايا من واحنا عمرنا سنه ولغايه دلوقتي حتي بعد ما كل واحده فينا اتجوزت عايشين في نفس المكان تقريبا
بس دا يرجع لان اصلا البلد عندنا صغيره
العزيزه اميره
اولا احب ارحب بيكي في اول زياره ليا
ثانيا ميرسي علي موضوع الشخصيه دا بس كده انا ممكن اتغر
وبالنسبه لمحمود من غير مظاهره ولا حاجه واضح انه بدأ يحن تاني للتدوين
ان شاء الله يكون فيه بينا زيارات متبادله
كل تاج وانتى طيبة
وربنا يسعدك ويكرمك مع اسرتك الكريمة
الاجابة على التاج بسيطة وجميلة
ومش محتاجة نقاش
تحياتى
طبعا انا كل ده عارفه فمضفتيش جديد بس يبقى خدى تاكس وتعالى المدونه عايز رائيك فى بوست يختى نقطع نفسنا انا وانتى على البلوج بدل ما نقطع نفسنا فى البيت
لما اجاوب اى تاج حبعتهولك وورينى حتجاوبى ازاى
اخوكى
محمود
السلام عليكم ورحمة الله وبركاته
أهلًا بكِ في عالم التدوين
تشرف بوجودك :)
وانا مع عدم الإنياز لحذب أو إتجاه معين
لكن مع كل وجهة نظر ورأي وعمل في صالح البلد بجد
تحياتي
يشرفني إني ألاقي بيني و بينك أي تشابه يا رانيا... انت واضح إن شخصيتك هادية رومانسية و بسيطة أوي
بالنسبة لبطل الكارتون :) مش كنت بحب كابتن ماجد عشان كنت بحس فيه حتة غرور، مش عارفة ليه :)، بس كنت بعشق ياسين صاحبه
و بطل الكارتون بالنسبة لي هو "روبن هود" لو تعرفيه :).
تحياتي ليكي تاني... وعشان مش تزعلي أنا لسة مش جاوبت على التاج دة..بس اصبري عليّ شويتين عشان مش متضبطة شوية بس :)
نشات وترعرت على مغامرات ادهم صبرى ونور الدين محمود وكان نفسى اتجوز واحد منهم
..............
ههههههههه
مرحبا بصديقة الجيل
أنا لما كنت أحب أعاقب نفسى
أقرأ مغامرات أدهم صبرى
ههههههههه
من إجاباتك
انتى شخصية جميلة جدا
تحياتى وحبى
ربنا يخلى أولادك ويبارك لك فيهم
إجاباتك جميله
ربنا يوفقك
بس إيه ده
بتحبي الشيكولاته
أنا مدمنه يا بنتي
ههههههههههههه
السلام عليكم
أدهم صبرى ونور الدين
أنا بعشق الروايات دى
شخصيتك جميله مثقفه
مطلعه
ربنا يوفقك
يا ولاد حد يقولي هو التاج ده ورايا ورايا .. كل ما ادخل عند حد الاقي تاج ... يكونش ده تاج الجزيرة ... السلطانية يعني ... هيه .. ياتري انت فين يا مرزوق
بعيدا عن التهريج البوست جميل والمدونة حدوتة
شوفى يا ام يحيي
كل اللى تاعبنى فى حياتى ضغطى العالى
يعنى انا باحسدك وباحسد الضغط الواطى
تحياتى من غير حسد
اميرة الصعيد
أنا عجبتني ايجباتك اوى
وبعدين انا صعيدي بردوا , يعني أتمني تزورى مدوناتي ونتعرف اكتر
مش فاهم انا الناس كلها ترعرت ونشأت وحبت ادهم صبري ونور على ايه
مالو تختخ بتاع المغامرون الخمسه؟؟
زي القمر
كلبوظ كده وعسل
وبعدين لحظه هنا
انتي معانا ولا مع التانيين؟؟
يعني احنا عمالين نحايل في محمود ونقولو ياعم ارجع للتدوين وهنجبلك شيكولاته وانتي تقولي خلاص اعتزل
لا فعلا جايه تهدي النفوس
شكلك كده طمعانه في الشيكولاته اللي هنجبهالو
---
اجابات نموذجيه فعلا .. وده مش غريب طبعا لانك اخت اخويا محمود اللي انا عاشرته ولقيته فعلا انسان محترم واحترمته واحترمت اهله لما عرفته اكتر
-
ارجوكي وجهي نداء لشيرين عشان ترجع للتدوين وخليكي جنبها يابنت الخال
آه صحيح .. في انبولات الشعر اللي انا طلبتها منك؟؟؟
سلاموووووووووووز
تامر نبيل
ميرسي يا تامر وياريت تداوم علي الزياره
منور ياريس
وانت عارف اي تقدم او اي خطوه للامام بتكون بفضل توجيهات سعادتك
شفت ازاي بعاملك زي الريس يا ريس
الجده فصيحه
انا اللي اتشرفت بوجودك عندي يا تيته ومتتأخريش علينا في البوستات الهايله بتاعتك
فراشه التدوين الجميله
روبن هود حته واحده الله يسهلك يا عم دا انتي كده وصلتي للعالميه انا عن نفسي كنت بحب العالم بتاعه اه بس اتجوزه واعيش معاه لا يا عم يفتح الله
كاميليا
عارفه لو ادهم صبري عقاب يبقي انا نفسي اتعاقب
منوراني
salwa
انا كنت زيك مدمنه بس ولاد الحلال عالجوني في مركز متخصص لادمان الشيكولاته وبقيت اخد جرعات متقطعه
أميرة الصعيد
السلام عليكم
بعشق لحظات الشروق والغروب وبعز هدوء الليل ومصاحبه نجمه بحكى معاها على اللى مش ممكن احكيه لحد
.......
ايه الرومانسية دي يا عم؟؟
بوست جميل
ومدونة رقيقة زي صاحبتها
شكرا لزيارتك
تحياتي واحترامي
شهرزاد
abo7anf
انا متهيألي ان الغالبيه العظمي من جيل الشباب بيحب مغامرات ادهم ونور
الف شكر علي الزياره وياريت متكونش الاولي والاخيره
miss.sosa
اصل الظاهر كده والله اعلم ان التاج ده في التدوين زي ختم النسر عند الحكومه مفيش مدونه تنفع من غيره
كلام علي بلاطه
عرف يا استاذ ناجح محدش راضي بحاله ولا ابو ضغط واطي ولا ابو ضغط عالي
علي العموم نصيحه مني كتر من عصير الدوم والكركديه الساقع
حماده زيدان
يا مرحب بالصعايده عشردقايق وهاخد اول تاكس وعلي مدوناتك علي طول ياريت تستناني بكوبايه عصير قصب علشان الحر اللي احنا فيه ده
soooo
ازيك يا سو شوف يا سيدي بالنسبه لتختخ فهو كلبوظه وأمور اه بس مش جان يعني منفكرش نتجوزه علشان كده البنات بتحب ادهم ونور علشان فيهم من كله اكشن ورومانسيه ووسامه وانت عارف البنات
وبعدين يا سيدي بالنسبه لمحمود انا كنت واثقه انه مش هيعتزل اصلك مكنتش بتشوفه وهو بيفتح الكمبيوتر يبص شويه ويقفله كانت ايده بتاكله بس كان محتاج شويه وقت
والله يا سو انا مش عارفه اعمل ايه مع شيرين انا زعلانه خاص علشانها وبقولها ارجعي يا شيرين علشان انا فعلا في الفتره البسيطه دي حبيتك جدا واديكي شايفه الناس كلها زعلانه ازاي من قرارك
واخ حاجه عايزه اقولهالك الامبولات شاحه في السوق بس انا كلمت واحد معرفه معه صيدليه اول ما تنزل هيخليلي علبه للحبايب بس خلي الموضوع ده في سرك علشان الاحراج مع الناس اصلها علبه واحده ومش هعرف ادي مين ولا مين
شهرزاد
منوراني انهارده يا شهر يازينه الف ليله
علي فكره موضوع النجمه ده بينفع جدا لما يكون عندي شحنه واكون مش عايزه حد يشوفني في لحظات ضعفي
الف مبروك التاج
ما شاء الله .. انتى اخت محمود؟؟
بجد فرحت اوى لما لاقيتك عاملة مدونة مع سيادة الرئيس بتاعنا ومنورين بيها عالم التدوين كله
للأسف معرفتش افيدك فى فتح المدونة بس على الله يكون محمود قام بالواجب ورفع راسنا كدة
:D
منورة ياقمراية بجد
شفقه واحسان
انا الاول استغربت الاسم بس بعدين عجبني
الله يبارك فيكم
انسانه
بصي يا ستي هو الريس اقنعني بالتدوين اه لكن قام معايا بالواجب في انشاء المدونه نص نص قال وعاملي فيه ريس
بسم الله
مدونه حلوة وبوست حلوووووووو واجاباتك صريحه
تحياتى
جيلان
يا سلاااااااااااااااام
بتهرجي
اخت محمود هنا
اخت الريس
اهلا بيكي يا قمر
و اهلا بالصعيد
انا صعديه زييكي برضه
انتي عامله زييا
مصاحبه فينوس .. و بحكيله على كل حاجه
و بحبه جدااااا
تحياتي يا قمر
و ربنا معاكي يا رب
و سلامي للريس :))
زيزي
هاي يا زيزي
منوراني والله وعلي فكره انا مش اخت الريس لا الريس هو اللي اخويا
إرسال تعليق