الثلاثاء، 20 مايو 2008

لنا الله

نمله بتحكي لبنتها عن ذكرياتها
النمله الام : احنا كنا بندخل علي كيلو السكر نجيب اخره ومحدش يقولنا بتعملوا ايه
النمله الابنه :يعني ايه سكر يا ماما
------------------------------
في اليوم اللي اسعار البنزين زادت فيه جوزي نزل يجيب خزين البيت رجع شكله غير ما نزل خالص وعمال يبرطم وسمعت كلمه لا حول ولا قوه الا بالله
مالك يا حبيبي فيه ايه ؟
قاللي شويه الطلبات دول انا متعود اجيبهم بتسعين او ميه جنيه بالكتير
ودلوقتي اشتريتهم بكام ؟
بميه وتلاتين جنيه
طاب معلش يعني انت مكنتش عامل حسابك في الفلوس وانت نازل
يا رانيا افهميني انا علي الناس الناس بره بتصرخ
وعارفين الخزين ده فيه الاساسيات رز ومكرونه وزيت وسمنه وجبنه وحلاوه طحينيه (وجيلي وبسبوسه علشان خاطر الاستاذ يحيي)
يعني خزين عادي بكميات متوسطه ومسحوق الغسيل والصابون والمنظفات وحتي السكر دول مالهمش علاقه بموضوعنا علشان بنشتريهم من مكان تاني يعني لو حسبناهم مع بعض يطلعوا مهيه موظف واكتر
طاب تعالوا معايا نشوف مرتب عامل اوساعي او حتي موظف صغير في الحكومه
نقول دول بياخدوا ما بين 200 و300 جنيه في الشهر
اكيد الناس دي معندهاش رفاهيه انهم يشتروا الطلبات بالشهر يعني عايشين يوم بيوم
نقول ان واحد من العمال دول فيه عقل وعامل تنظيم اسره وعنده عيلين بس هيعيش ازاي ؟ نحسبها
هيطبخوا مره واحده في الشهر
كيلو لحمه : 35 جنيه
كيلو رز: 4 جنيه
واي خضار دلوقتي تمن الكيلو 4 جنيه نقول هيشتري نص كيلو ب2 جنيه يعني الحسبه كلها 41 جنيه
نقول ان ده تمن اكل يوم واحد في الشهر علي اعتبار انهم هيتعشوا من نفس الاكل
بعد كده نحط متوسط للاكل عشره جنبه في اليوم (مش عارفه العشره جنيه هتأكلهم ايه فطار وغدا وعشا) كده يبقي الحساب 341 جنيه في الشهر لو كان الشهر 31 يوم طاب والفاكهه ؟ بلاش فاكهه احنا هنفتري ولا ايه
يفضل معانا مصاريف التعليم والمدارس من غير دروس خصوصيه علي اعتبار ان العيال شطار
ومصاريف المواصلات اوحتي مصاريف العلاج لو حد لا قدر الله تعب
يبقي الناس ياتسرق وترتشي ياتشحت
ومش لاقيه حل تاني
وبجد بجد لنا الله
#####
#####
غنوا معايا
حرام يا حكومه
وانت يا عز
انزل ع الارض
دا مفيش رز
وشح السكر
وجمال ناسي
اصول العد
فاكر ان
الشهر يومين
والناس بتحوش
م القبض
لما ابوه الريس قال
دي المنحه
30في الميه
رد عليه
الابن بدهشه
مش كده نعمه
زياده شويه
يلا وخلي الشعب يعيش
والناس تدعي
تقول يا رب
طول عمر الريس اكتر
وجمال ابنه يعلي ويكبر
هو وعز
ويملوا الارض
غنوا معايا
عمار يا حكومه
وبطلوا كدب
باسم الشعب

هناك 78 تعليقًا:

AHMED SAMIR يقول...

جمال بك مش مصدق الاحصائيات اللي بتقول ان 40% من المصريين تحت خط الفقر وبيقول ان الكلام دة كلام فارغ وان الاحصائيات دي ليس لها اساس من الصحة
انا رأيي انه قال كدة علشان هو فاكرهم اكتر من 40% بكتيــــــــــــــر
تحياتي

غير معرف يقول...

الله يحرق دمهم زى ما بيحرقو دمنا

وحسبنا الله ونعم الوكيل فيهم

Razi Soliman يقول...

نمله بتحكي لبنتها عن ذكرياتها
النمله الام : احنا كنا بندخل علي كيلو السكر نجيب اخره ومحدش يقولنا بتعملوا ايه

النمله الابنه :يعني ايه سكر يا ماما

هههههههههههههههههههههههههه
==================================

جملتك دى فكرتنى بمدرس التاريخ اللى كان بيشرح للطلبه موضوع عن اللحمه
الاستاذ : كان فى زمان حاجه اسمها لحمه ,
ساله طالب: هو شكلها كان عامل ازاى يا استاذ
قاله الاستاذ : كتاب الوزاره مش معرفها
بيتهىء لى على احنا فيه دا ان الموضوع دا ممكن يجى عليه يوم ويحصل اللحمه تنقرض والبنزين يختفى هى الحسنه الوحيده فى الموضوع دا ان السجاير لما سعرها زاذ فى ناس كتير بطلت تدخن لان الناس اعصابها دخنت
ربنا يصلح الحال
الى اقرب لقاء
رازى

الميكروباص يقول...

وهو جمال مبارك هايشوف فقراء فين
هو عمره أصلا مشي على رجله في مشوار ولا ركب مواصلات ولا عمره اشتغل عند حد
أما بالنسبة للي مرتبه 300 جنيه الحقيقه لو مد يده واخد رشوه يبقى محدش يلومه
وبالنسبة لموضوع المرض- ده اللي ربنا يستر فيه
لأني اعرف ناس تداينت عشان تتعالج
وربك يسترها

tarek alghnam يقول...

اميرة الصعيد
حرام يا حكومه
وانت يا عز
انزل ع الارض
دا مفيش رز
وشح السكر
وجمال ناسي
اصول العد
فاكر ان
الشهر يومين
والناس بتحوش
م القبض
انا غنيت معك اهو
ياترى ميت يسمع ومين يعمل
بوست رائع
تحياتى

غير معرف يقول...

حسبى الله ونعم الوكيل

هيعملوا قينا ايه اكتر من كدا
لاحول ولاقوة الا بالله

ابراهيم يقول...

الحياة في مصر المحروسة اصبحت تقاس باقرش ومثلها كل شي من اول الكرامة حتي رغيف العيش
ادعوك لزيارة مدونتي واتمني التواصل الدائم بيننا

HANY YASSIN يقول...

السلام عليكم
كلام مستفز حقاً والمفروض ان لما جمال يكلم محدش يسمعه او يعلق عليه لانها بقت حاجة تئرف
يقول اللى هو عاوزة وخلاص
ربنا هو اللى منتقم

دمتم بكل ود
تحياتى
هانى يس

اميره الصعيد يقول...

a.samir
هو مش مصدق لانه عنده احصائياته اللي بيقدمهاله اعضاءالحزن الوطني ولا عزاء للفقراء

اميره الصعيد يقول...

همس
دول دمهم ميتحرقش دول ببرود اعصابهم يحرقوا دمنا احنا لغايه ما نموت وبعدين يستوردوا شعب جديد

اميره الصعيد يقول...

رازي الهواري
انت عارف في ناس فعلا نسيت شكل اللحمه والله انا خايفه بعد كده الناس تاكل لحم كلاب وقطط بمزاجها

اميره الصعيد يقول...

لورنس العرب
انت غلطان يعني انت متخيل ان جمال بيه بعيد عن الشعب كده لا طبعا هو شاف فقراء كتييييييير بس في الصور
وصدقني ال300 جنيه دي انا شفت ناس بتاخدها مش لاقيه جنيه تجيب بيه عيش وهما لسه في اول الشهر ما بالك بالشهر كله يعني حتي المرض بالنسبه لهم رفاهيه

اميره الصعيد يقول...

طارق الغنام
صدقني لو كلنا غنينا الوضع هيتغير بس الناس تصحي من غيبوبه اكل العيش اللي الحكومه حطاها فيها

اميره الصعيد يقول...

مواطن زهقان
يا اخي المواطن لا تحزن لسه التقل ورا

اميره الصعيد يقول...

هاني يس
يعني احنا كنا بنسمع مين قبله ما اهم كلهم واحد بس بدل ما كان اللي بيتكلم مسئول في الحكومه بقي اللي بيتكلم الحكومه نفسها وغيرت اسمها كمان بقي اسمها جمال

اميره الصعيد يقول...

ابراهيم
صدقني الحياه في مصر المحروسه اصبحت لا تطاق وكرامه ايه اللي انت بتحكي عنها دي انقرضت من زمان بقي في حاجه شبهها اسمها وضع بتعمله الواسطه والمحسوبيه وانت ابن مين في مصر
اما العيش فهو علي وشك الدخول ضمن الاشياء المنقرضه في المتاحف

WhItE HeArT يقول...

اه هغني واعيد معاكي مليون مرة كمان

بوست فيه ألم ربنا يستر من بكره

تحياتي

الباحث عن الحقيقة يقول...

عمار يا حكومة
وبطلي كدب باسم الشعب
ان بنعيش عصر تاريخي
بكره اولادنا لما يكبروا هيتفوا في وشنا
ويقولونا ازاى كنتم عايشين كده
انا مكسوف اوى من المستقبل لما اتجوز واخلف وابني يسألني
بابا هو انتم كنتم جبناء اوى كده ليه؟
انتم مكنتوش بتحبوا البلد دى
بابا مش هو انت مصري
معلش اصل اسألة العيال كتيره
حسبي الله ونعم الوكيل

زيزو الشقى يقول...

انا مدون جديد

دى اول زيارة ليا


مدونتك حلوة اوى ودمها شربات

عز الدين


سلااااااااام

Empress appy يقول...

طيب سؤال هى الاله الحاسبه اللى كنتى عماله تحسبى بيها باظت وهيست ولا سليمه سؤال برئ
الناس مبقتش تحسب خلاص ومبقتش تاكل خضار خلاص

رئيس جمهوريه نفسى يقول...

بصى حسبتك دى معناها جميل قوى والقصيده روعه بس انا توصلت لحل تيجى تفتحى معايه موضوع جواز ليه حخطف يسر وخليها عندنا فى البيت انا نبهت اهو

كوارث يقول...

نسيتي طبعًا مصاريف الكهرباء والمية
ومصاريف الايجار لو كان مأجر
ومصاريف السجاير لو كان مدخن
ومصاريف الفسح لو كان لسه فيه روح وبيعرف يفرح
انا عن نفسي بقالي سنين بفكر في الموضوع ده والله
ازاي موظف محترم - ده واحد اعرفه - دخله كله 190 جنيه في الشهر من الحكومة - بعد العلاوة نصهم بدون مبالغة رايح في سجاير ومتجوز ومخلف وبيصرف على بيته !
ده مجرد نموذج من ملايين في مصر ده غير اللي ما بيشتغلوش !!
النتيجة كانت حاسمة وواضحة
المواطن المصري نجح بدون اي مجاملة في انه يحقق المستحيل
من الآخر
اتحول لسوبر مان !!

سارة البحر يقول...

وهو جمال هيحس بالشعب ليه وازاي
هو عايش حياته في ملاينه وفي القصر الجمهوري في شرم باباه
ربنا يهدينا ويهديهم
مرسي اوي بجد وتحياتي لييك

مواطن مصري يقول...

جمدة
بجد حلوة

يوميات فنانه مفروسه جداا يقول...

انا زهقت وربنا كل ما روح حته الاقيهم يتكلمو علي غلاء الاسعار

يا رب ارحمنا برحتك يا كريم وخلصنا علي خير

تدوينه جامده سلام

Wish I were a Butterfly ... يقول...

المشكلة فعلا إن المصاريف اللي اتكلمتي عنها دي دة و انت بتتكلمي على الأساسيات و بس، يعني لسةمش دخلتي في أي حاجة فيها ريحة رفاهية حتى
زي ما فيه ناس متعرفش اللحمة غير كل عيد "لووصلتهم يعني" ممكن اكيد يبقى فيه يوم يستغربوا السكر و الرز. كفاية عليهم العيش

نصيحة..متحسبيش أي حاجة عشان مش يجيلك ضغط
هغني معاكي و اقول حرام يا حكومة و عمار يا مصر و كل حاجة... بس تفتكري حد هيسمع؟؟
لنا الله فعلا... جميلة كلماتك يا رانيا
تحياتي

man in black يقول...

ايه يا شعب يا حاقد بتغلطو ليه في عز وجمال فيها ايه يعني لما مانلاقيش ناكل فيها ايه لما نلجأ للطب الشعبي شوية الواد سخن فيها ايه شوية كمادات و يبقى زي الفل البت بتسهل فيها ايه شوية ماعرفش ايه وتبقى زي الحصان بس المهم ان جمال باشا وعز باشا و أخواتهم يبقوا بخير عشان مصر هي مصر من غيرهم تسوى حاجة بلاش حقد بقا

اميره الصعيد يقول...

white heart
صدقني البوست مش فيه الم لكن فيه واقعيه

اميره الصعيد يقول...

الباحث عن الحقيقه
يا راجل خليك واقعي هو في حد بعد كده هيكون عنده الامكانيات الماديه انه يتجوز علشان ولاده يسألوة
وحتي لو قدر يجهز نفسه ماديا هيكون خلاص قطع الخلف

اميره الصعيد يقول...

زيزو الشقي
اهلا بيك يا عز الدين

اميره الصعيد يقول...

appy
اله حاسبه مين يا ماما انتي بتهرجي
بعناها الاسبوع اللي فات واشترينا ليحيي حلاوه
بيني وبينك خايفه الواد يطمع في الكمبيوتر
اصل الاسعار بقت ناااااااار

اميره الصعيد يقول...

الريس
بكده انا هفتح معاك موضوع الجواز من بكره بس تكون عند وعدك وتخطف يسر اهو جدها يشيل مصاريفها

اميره الصعيد يقول...

كوارث
طبعا الحسبه بعد اضافه المواضيع دي هتكون كارثه بكل المقاييس يا كوارث

شهرزاد يقول...

ربنا يفرجها يا رب
لقد أصبت يا صديقتي
وأظن أن الأسعار ستستمر في الارتفاع
وأن عدد الفقراء في ازدياد
وقد يحصل مجاعات أو ثورات من أجل رغيف الخبز
ربنا يفرجها يا رب
ولنا الله هو الرزاق
وتحياتي

اميره الصعيد يقول...

ساره البحر
انا عارفه ان جمال مش حاسس ولا عايز يحس بس اذا كان الوضع كده عايز يحكمنا ليه مش خليه في شرم احسن

اميره الصعيد يقول...

مواطن مصري
ميرسي جدا علي رايك

اميره الصعيد يقول...

يوميات فنانه مفروسه
احنا اسفين جدا يا فنانه تعبنا اعصابك طبعا ماهم الفنانين دايما بيحبوا يعيشوا في الخيال

اميره الصعيد يقول...

الفراشه الجميله
بصي بقي حاليا انا اغلب اللي اعرفهم مبيدوروش علي اي رفاهيه خصوصا لو كان عندهم اولاد في مراحل التعليم المختلفه بتبقي الاولويه للدروس الخصوصيه
صدقيني ناس كتير نسيت طعم الفسح والرحلات او اي حاجه فيها ريحه الرفاهيه وبيحسبوها بالورقه والقلم

اميره الصعيد يقول...

man in black
ربنا يحمي جمال بيه وعز بيه احنا قلنا حاجه يا راجل دا احنا بنهزر

اميره الصعيد يقول...

شهرزاد
ان شاء الله ربنا هيفرجها بس عارفه لو حصلت ثورات من اجل رغيف الخبز يمكن الوضع يتغير واللي فوق يحسوا بالناس

klmat يقول...

معاكى حق يارانيا .الواحد بيقول الحمد لله
ماشيه لكن لما بشوف طوابير العيش والاتوبيسات والناس اللى متشعلقه على السلم قلبى بيتقطع وبعد كل الشقا ده مش
بيقدروا يجيبوا طلباتهم ده لو الصحه كويسه ولو لا قدر الله حد تعب اسعار الدواء والكشف عند دكتور كويس نار والمستشفيات الحكوميه تجيب المرض
حسبى الله ونعم الوكيل
اكيد دوام الحال من المحال وربنا يورينا يوم فى اللى وصلونا لكده
احييك على الوضوع القيم وطريقه السرد الجذابه
ربنا يكرمك ويحفظك انتى واسرتك
سلاااااام

موناليزا يقول...

الحسبة دى مش غريبة عليا
بس ياترى اللى بيزودوا الاسعار بيحسبوها كده؟؟ طبعا لا لانهم مش شايفين الناس اصلا

سبهللة يقول...

فكرتينى بتدوينة كنت كاتبها من فترة
عنوانها
تقدر تعيش فى مصر بألف جنيه؟؟؟؟؟
دة اللينك بتاعها
http://sabahlalah.blogspot.com/2008/04/1000.html
دى اول زيارة ليا وان شاء الله تتكرر
وعجبنى اوى اسمك اللى على اسمى يا رانيا
تحياتى ليكى وبالتوفيق ان شاء الله

اميره الصعيد يقول...

اميره
عارفه يا اميره الوضع عندنا في الصعيد سىء اه بس مش بالدرجه المهوله اللي في المحافظات الكبيره يمكن الناس عندنا لسه ماخدتهاش دوامه الحياه وحاسين ببعض
بس برضه الحياه صعبه والله اكتر حاجه بتتعبني ان حد يكون عيان ومفيش في البيت 3 جنيه يروح بيهم مستوصف
يعني عمرك شفتي واحده ضهرها يوجعها تروح تستلف العلاج بتاع فلانه اللي رجلها كانت واجعاها واهه كله وجع عظام
بس برضه انتى منوراني

اميره الصعيد يقول...

موناليزا
علي فكره اللي بيزودوا الاسعار اسساسا من شروط تعيينهم انهم يكونوا مبيعرفوش حساب
اهم شرط في التعيين انه يحفظ كلمتين حاضر سيادتك تحت امر معاليك

اميره الصعيد يقول...

سبهلله عالاخر
يعني مش بس تشابه اسماء لا كمان توارد خواطر
منوراني يا رانيا

HERO يقول...

انا مش مقروص من الحاجات دي كلها الا في البنزين بابا ربنا يخليهولنا يارب قايم بالواجب وزيادة الا البنزين مش بيدعمه معرفش ليه

والناس دي فعلا لها الله وحسبي الله ونعم الوكيل

انا اول مرة ازورك ومش هتكون الاخيرة ان شاء الله

تحياتي

اميره الصعيد يقول...

hero
علي فكره كلنا محتاجين حد يدعمنا
احمد ربنا انها جات علي البنزين
شكرا علي الزياره
تحياتي

ليله بكى فيها القمر يقول...

السلام عليكم
بكرة احنا اللى هنقول لماما يعنى ايه سكر يا ماما
يعنى ايه عيش يا ماما
تحياتى العميقه

الربان يقول...

تحياتي

ربنا يساعد الجميع علي مواجهة الغلاء
و تدبير نفقات الحياة التي تزداد يوما بعد الاخر....

يارب ارفع عنا البلاء و الغلاء...و اجعل هذا البلد امنا مطمئنا سخاءً رخاءً و سائر بلاد المسلمين.

تحياتي و تقديري

سندباد يقول...

فعلا والله لناالله ربنا يرحمنا من العصابة دي
لكي تحياتي

شـمو نشـادر يقول...

زياره اولى لمدونتك الجميلة ..
بجد اسلوبك لذيذ و دمه خفيف ..
هنقول ايه بقى .. يا ريته اصلا ما ادى التلاتين فى الميه دول ..
يرفع المرتبات .. الحاجه تغلى اكتر .. يقوم رافع تانى .. تقول الحاجه تولع كمان وكمان .. وهكذا لحد ما نروح نشترى خمس طعميات نفطر بيهم ناخد معانا شنطة فلوس ..
علماء الاقتصاد بيسموها الدائرة الجهنمية ..
ربنا يستر ..
تحياتى ..
أسامة أمين

حاجات جوايا يقول...

ربنا كبيررررررررررررر

أعتقد ان احنا مع كل اللى بيحصل ده لسه فى البداية .. ولسه ياما هنشوف

ربنا معانا

بوست رائع يا رانيا

دمتى بخير

واحد من البلد دى يقول...

جميلة جدا على فكرة..
اللى عجبنى أكتر الزجل اللى فى الآخر ..
تسلم إيدك

princess يقول...

حسبى الله
يعنى الواحد يروح فين انا بقالى فترة بفكر اقعد فى المريخ واستقر هناك
بس لسه عارفة قريب انهم اشتروه وهيخصخصوه
تحياتى
اول زيارة والمدونة جميلة اوى

الجنوبى يقول...

لا لا لا لا ملكيش حق دا على راى المثل

دى لا باظت ولا خربت ولا جابت جاز




اميرة الصعيد

عمرو

Hosam Yahia حسام يحيى يقول...

حسبى الله ونعم الوكيل

ماشاء الله مدونه جميله


ان شاء الله الزياره هاكررها تانى

.:.-=- ELGaZaLy-=-.:. يقول...

لا اله الا الله

انا حاسس ان على ما شادى يحكمنا هانبقى زى رواية اله الزمن
ناس عايشة تحت الارض وناس فوق

اه شادى نسيت اعرفكم شادى جمال مبارك

وبعدين انا شايف ان قمة الحلا ان الراجل دة ياخد رشوة اه يا بلد يا ولاد ال....

بنت الاسلام يقول...

فعلا احنا الحمد لله قدرنا نجيب احتياجاتنا

مابالك فعلا بالناس الي مادياتها منعدمة وما اكثرهم

نفسي الناس ديه تنزل الشوارع والحواري والازقة وتدخل البيوت وتشووووووووف احواااااال الناااااس


لنا الله

لكن ربنا مايرضاش بالظلم


ولايرضي بالسكوت علي الظلم

واحنا ساكتين

لاء خايفين

شهرزاد يقول...

ههههههه
يبقى أنتِ أكيد أكيييد في مصر
أسوأ حاجة زيادة فوق غلو الأسعار وانعداما لضماير احنا!!!
في ناس بتقول الشعب غلبان عايز يعيش
وأنا بقولك الشعب ناقص تربية
الناس بتعلق سلوكياتها الخاطئة على الأنظمة فقط ونسيت إنهم ممكن يرحموا بعض شوية
أيام أزمة العيش اللي شكلها مانتهتش
كانت الناس بتضرب بعض وتموت بعض
ساعتها أنا ماكنتش عارفة أدعي على مين بالظبط
وكنت بقول دعاء مشهور ضد كل ظالم ومفتري
حسبي الله ونعم الوكيل
وفعلا زي ماقلتي
لنا الله

(احمد سكر ) يقول...

طب النمله حالها بقى ايه دوقتى

يا استاذه رانيا

خلاص العيار فلت

اللى فوق بقى فوق خلاص ومش نازل

اما اللى تحت

كل شويه بينزل تحت الارض

على رايك

لنا الله

تحياتى اختى الفاضله

اخيكى
احمد سكر

اميره الصعيد يقول...

ليله بكي فيها القمر
بكره احنا هنقول يعني ايه اكل يا ماما لان المعده بتاعه المصريين هيحصلها ضمور

اميره الصعيد يقول...

الربان
احنا اكيد بندعي ربنا يرفع عنا الغلاء بس برضه ربنا بيقول اسعي يا عبد يعني لازم نعمل حاجه

اميره الصعيد يقول...

سندباد
لو متحركناش هنفضل علي كده علي طول عصابه تسلمنا لعصابه

اميره الصعيد يقول...

شمو نشادر
بص يا اسامه اصلا التلاتين في الميه دي كانت اسبرينه يعني مسكنه مش اكتر يعني بيها من غيرها الحاجه بتولع
احنا في بلدنا عايشين كده اللي فوق ياكلوا واللي تحت يتفرجوا ويدفعوا تمن الفرجه

اميره الصعيد يقول...

العزيزه سالي
انا معاكي يا سالي هنشوف كتيييييييير
تحياتي

اميره الصعيد يقول...

واحد من البلد دي
شكرا علي رايك
تحياتي

اميره الصعيد يقول...

princess
انتي دلوقتي اللي فكرتي في المريخ انا اشتريت في المشتري وعملت حساب الزمن واشتريت للعيال

اميره الصعيد يقول...

انسان بلا عنوان
يا اخ عمرو دا ريحه الجاز ماليه المكان بس الظاهر الحي عندكوا لحق نفسه وركب فلاتر

اميره الصعيد يقول...

حسام يحيي
بضم صوتي لصوتك وبقول يا رب يا تاخدهم يا تاخدهم

اميره الصعيد يقول...

الغزالي
شادي مين يا استاذانت فاكر انه لسه ما حكمش بيقولوا ان المحافظتين الجداد عملوهملو يجرب فيهم

اميره الصعيد يقول...

بنت الاسلام
اختي العزيزه حتي لو الناس دي نزلت الشوارع ودخلت البيوت برض هيقولوا ان الاحوال زي الفل والناس مبسوطه والحياه بمبي بمبي بمبي بمبييييييي

اميره الصعيد يقول...

شهرزاد
اهلا باميره الف ليله
يا بنتي الناس عارفه انها لو ماخدتش الاول مش هتاخد خالص
وبرضه الانظمه هي اللي زرعت ده فيهم لان الخدمات محدوده والعدد كتييييييير

اميره الصعيد يقول...

سكر
اخي احمد سكر
الناس اللي تحت هي اللي اتعودت تبقي تحت مش بيحاولوا ياخدوا حقهم هما يصعبوا علينا اه بس لازم يتحركوا

3ala asm masr يقول...

حسبى الله ونعم الوكيل والله انا مش عارفه الموظف اللى بياخد 300 جنيه ده عايش ازاى ده انتى حتى محسبتيش الايجار على اساس انه عنده بيته ملكه

أمل فتحى عزت يقول...

أسعدنى المرور بمدونتك
وأدعوك لزيارة مدونتى
************************
تعالوا نسافر المسافات الى زمن من المحبة لا ينتهى
****************************
كما أدعوك لقرأة قصتى
( بكل لغات العالم أحبك)
************************
ولك منى جزيل الشكر

كاميليا بهاء الدين يقول...

انا مش عارفة اقول ايه

حسبنا الله ونعم الوكيل




تحياتى وحبى

الفقيرة إلى الله أم البنات يقول...

حسبنا الله ونعم الوكيل
ال100 اصبحت لا تساوى شئ
اصبحت فى مقدار العشر جنيه
لا تستطيع ان تستخدمها لشراء متطلبات البيت لاسبوع زى زمان
وزمان ده من 5 سنوات مثلا

اميرة
نسأل الله ان يعفو عنا..ولا يؤاخذنا بتقاعسنا