الأربعاء، 10 فبراير 2010

مناجاه





أيا حبيبا تعشقه الملايينا

اقبلني بعضا في زمره محبينك

اقبلني شيئا مغلوبا علي امره

نبضا ضعيفا تأسره بأحسانا

اتراني اقوي ان تسخط لهفواتي

وان تشيح بوجهك عني غضبانا

اقبل دموعي قربانا لاخطائي

اقبل بكائي بين يديك محزونا

انا من اكون في ملكوت ابداعك

وهم تلاشي بعد ظهوره حينا

انا من اكون في ضعفي لقوتك

حلما00سرابا 00مأواه الي الطينا

ايا حبيبا لا اقوي علي بعده

اقبل وصالا بغيره قلبي مسجونا

اغفرغروري قد كنت في جهل

وقد نسيت بأني خلقت من طينا

ابدعت خلقي وضن لساني بالشكر

بل ظل يلغو بقول لا ينجينا

اجزلت لي بكل الخير من نعمك

وانا عصيت الامر مصحوبا بتهوينا

وهل من توبه تجدي مع عاص

اقبلها مني وامنن علي غفرانا

قد اخبرتنا بأنك اكرم يجزل

وانا في كرمك قد اصبحت طمعانا

ايا حبيبا يرحمنا ويحيينا

ارحمني منه خناسا وملعونا

وانصر ايمانا قد اسكنته قلبي

حتي اسير اليك يوم العرض مأمونا

ايا حبيبا جل رضاءه املي

بحب الله قلبي صار مفتونا

الثلاثاء، 3 يونيو 2008

انشوده حب


في البدايه احب اعرفكم اني بحب البلد دي جدا

برغم انها بقت عزبه خاصه وملاكها محدود ين

برغم اننا علي بابهم شحاتين

انا بموت في البلد دي حتي لو جمال وعز كتبوها باسمهم

انا بعشق البلد دي رغم ان نص شعبها من الاكل محرومين

انا بحب البلد دي رغم الفساد والرشوه والمحسوبيه

واطفال الشوارع اللي ماليينها والبطاله وفلوسنا اللي سافرت بره

واملاكنا اللي اتباعت بتراب الفلوس بدعوي الخصخصه

وممدوح اسماعيل اللي سافر بعلم الحكومه

وهايدلينا والمتاجره حتي بالمرض

وفي الاخر البراءه لهاني سرور

انا بحبها غصب عن عين اي حد

بحبها غصب عن عين الحزن الوطني

علي بلاطه

انا بعشق كل ذره تراب فيها

واكيد كل ليل وله اخر

@@@@@@@@

ودلوقتي بقي نقدر نقول



عشت احبك

عشت اشوف نيلك دمايا

دم صافي

اصفي من نبع الحياه

اصل اصل المصري صافي

اصله كلمه من اله

****

لون ترابك

هو لون وش الصبايا

هوكحل ف عين حبيبتي

هو تكملة الحكايه

اصل كل مصري فيكي

له حكايه

بيها نرجع للبدايه

عشت احبك

****

حرف اسمك

هواسمي

هورسمي

هو لوني ف كراساتي

هو زرع ف نبت قلبي

او سلاح ف ادين ولادك

بيه يعدوا كل صعب

بيه ينولوا المستحيل

او يقولوا الخير دا منك

حرف اسمك

هو تكمله الهجاء

****

سمك طينك

فيه اغوص

فيه اعيش احلا حياه

ماسك الفاس الاصيل
بيطاوعني
اصله مصري

مصري من قلبه يقول

عشت احبك

****

نور صباحك

هو نور وش الولاد

نور محمد او ميلاد

يصحوا م الفجر يوماتي

ياخدوا بعض عالغيطان

وان قالولهم

انت مسلم

وانت اصلك معمدان

يمشوا دوغري من سكات

ويغنوا بالصوت الاصيل

عشت احبك


##############################

تحديث

اولا انا اسفه اني مرديتش علي التعليقات

بس ده كان لظروف خارجه عن ارادتي

ثانيا انا فكرت اني ارد علي التعليقات كلها في

التحديث ده لاني حاسه ان الموضوع اكبر

من كلمتين في كل تعليق

بالنسبه لموضوع حب البلد دي

اللي احنا عايشين فيها

اللي اسمها مصر

ازاي يكون فيه مننا ناس بتكرهها ؟

ازاي يقولوا احنا مبنحبهاش؟

امال عايشين فيها ليه؟

يا جماعه ياللي بتكرهوا مصر وبتقولوا احنا مش قادرين نحبها

هو مين اللي وصل مصر للي هي بتمر بيه ؟

مين اللي ساكت عن المطالبه بحقه ؟

مين اللي بيتعامل مع كل المرافق اللي فيها باهمال؟

مين اللي سايبها لشويه حراميه وقاعد يتفرج؟

اعتقد ان الاجابه هي اننا احنا اللي عملنا كل ده

وبعدين نقول اننا بنكرهها

يعني بدل ما نصلح كل اللي عملناه فيها رايحين نكرهها

طاب ياللي بتكرهوا مصر ناويين تربوا عيالكم ازاي

ناويين تعلموهم يحبوا ايه بدل وطنهم ؟

ولا تكونوا ناويين تشتروا وطن تاني

او تدوروا علي وطن بالايجار

كده هتحصل ازمه هويه في الاجيال الجديده

واحنا مش ناقصين بلاوي

وافتكروا ان اللي لازم يتكره مش الوطن

اللي لازم يتكره مش مصر

احنا لازم نكره اللي يهد فيها وميبنيش

لازم نكره اللي علي السلبيه اتعود يعيش

لازم نكره الحكومه اللي تاخد ومتديش

واخواننا اللي بيحبوها اقوللهم ان الحب ليها مش كفايه

احنا لازم نعمر ونغير ونخليها احلي واجمل وطن

حبيبتي مصر

################

ملحوظه صغيووووره واضح جدا ان الانبول اللي استورده سووووو شغااااااااااااااال

##############################

الثلاثاء، 20 مايو 2008

لنا الله

نمله بتحكي لبنتها عن ذكرياتها
النمله الام : احنا كنا بندخل علي كيلو السكر نجيب اخره ومحدش يقولنا بتعملوا ايه
النمله الابنه :يعني ايه سكر يا ماما
------------------------------
في اليوم اللي اسعار البنزين زادت فيه جوزي نزل يجيب خزين البيت رجع شكله غير ما نزل خالص وعمال يبرطم وسمعت كلمه لا حول ولا قوه الا بالله
مالك يا حبيبي فيه ايه ؟
قاللي شويه الطلبات دول انا متعود اجيبهم بتسعين او ميه جنيه بالكتير
ودلوقتي اشتريتهم بكام ؟
بميه وتلاتين جنيه
طاب معلش يعني انت مكنتش عامل حسابك في الفلوس وانت نازل
يا رانيا افهميني انا علي الناس الناس بره بتصرخ
وعارفين الخزين ده فيه الاساسيات رز ومكرونه وزيت وسمنه وجبنه وحلاوه طحينيه (وجيلي وبسبوسه علشان خاطر الاستاذ يحيي)
يعني خزين عادي بكميات متوسطه ومسحوق الغسيل والصابون والمنظفات وحتي السكر دول مالهمش علاقه بموضوعنا علشان بنشتريهم من مكان تاني يعني لو حسبناهم مع بعض يطلعوا مهيه موظف واكتر
طاب تعالوا معايا نشوف مرتب عامل اوساعي او حتي موظف صغير في الحكومه
نقول دول بياخدوا ما بين 200 و300 جنيه في الشهر
اكيد الناس دي معندهاش رفاهيه انهم يشتروا الطلبات بالشهر يعني عايشين يوم بيوم
نقول ان واحد من العمال دول فيه عقل وعامل تنظيم اسره وعنده عيلين بس هيعيش ازاي ؟ نحسبها
هيطبخوا مره واحده في الشهر
كيلو لحمه : 35 جنيه
كيلو رز: 4 جنيه
واي خضار دلوقتي تمن الكيلو 4 جنيه نقول هيشتري نص كيلو ب2 جنيه يعني الحسبه كلها 41 جنيه
نقول ان ده تمن اكل يوم واحد في الشهر علي اعتبار انهم هيتعشوا من نفس الاكل
بعد كده نحط متوسط للاكل عشره جنبه في اليوم (مش عارفه العشره جنيه هتأكلهم ايه فطار وغدا وعشا) كده يبقي الحساب 341 جنيه في الشهر لو كان الشهر 31 يوم طاب والفاكهه ؟ بلاش فاكهه احنا هنفتري ولا ايه
يفضل معانا مصاريف التعليم والمدارس من غير دروس خصوصيه علي اعتبار ان العيال شطار
ومصاريف المواصلات اوحتي مصاريف العلاج لو حد لا قدر الله تعب
يبقي الناس ياتسرق وترتشي ياتشحت
ومش لاقيه حل تاني
وبجد بجد لنا الله
#####
#####
غنوا معايا
حرام يا حكومه
وانت يا عز
انزل ع الارض
دا مفيش رز
وشح السكر
وجمال ناسي
اصول العد
فاكر ان
الشهر يومين
والناس بتحوش
م القبض
لما ابوه الريس قال
دي المنحه
30في الميه
رد عليه
الابن بدهشه
مش كده نعمه
زياده شويه
يلا وخلي الشعب يعيش
والناس تدعي
تقول يا رب
طول عمر الريس اكتر
وجمال ابنه يعلي ويكبر
هو وعز
ويملوا الارض
غنوا معايا
عمار يا حكومه
وبطلوا كدب
باسم الشعب

الثلاثاء، 6 مايو 2008

التاج الاول



اول تاج فى حياتى البلوجريه متمرر من الرقيقة شيرين صاحبت بلوج لحظات التاج بسيط فى اسئلته صعب فى الاجابات وكل المطلوب فى التاج انى اذكر عشر اشياء عن شخصى بس انا حخرج من موضوع العشر اشياء علشان بكره التقيد وحتكلم عن نفسى فى المطلق واحسبو انتو برحتكم

اسمى رانيا فاوى عندى 26 سنه حاصله على ليسانس اداب قسم انجليزى ومفيش شغل بامر الحكومه متزوجه وربنا ادانى يحيى 3 سنوات ويسر سنه لدى من الاشقاء اتنين ايهاب وده الكبير ومحمود الى هو ذاته رئيس جمهوريه نفسى وبعز جدا والدى ووالدتى ودول اول اهتماماتى

بحب جدا الادب بكل انواعه وكتابات يوسف ادريس ويوسف السباعى واحسان عبدالقدوس ونجيب محفوظ واشعار فاروق جويده واحمد فؤاد نجم والابنودى ومن الادب العالمى وليم شكسبير ونشات وترعرت على مغامرات ادهم صبرى ونور الدين محمود وكان نفسى اتجوز واحد منهم
لما كنت بسمع اغانى كنت بحب اسمع نجاه وعبدالحليم حافظ ومحمد منير وحاليا بكتفى باغانى محمد منير الوطنيه وسامى يوسف
بحب الدروس الدينيه للشيخ يعقوب ومحمود المصرى ومحمد حسان وهما بيتكلموا كويس فى الدين بس نفهم صح وبتابع اغلب القنوات الدينينه
مرتبطه جدا باصحابى واحنا مع بعض من ايام الروضه وكل فتره بتنضم لشلتنا عضوه جديده واحدث عضوه فى الشله انضمت واحنا فى ثانويه عامه والحمد لله مازلنا على اتصال ببعض حتى الان
بعشق لحظات الشروق والغروب وبعز هدوء الليل ومصاحبه نجمه بحكى معاها على اللى مش ممكن احكيه لحد
بكره فى حياتى الغباء والكذب ممكن اسامح يحى ابنى فى الغلط بس اعاقبه بشده على الكذب
ماليش اتجاهات سياسيه وفكريه محدده بس الى بحس انه صحى بتبعه او بميل اليه ( اى حاجه ضد الحكومه اكيد صح ) زى مثلا احيانا ممكن اتعاطف مع الاخوان مش كفكر ولكن ككيان مش واخد الفرصه انه يعبر عن رائيه حتى لو اختلفنا مع رائيهم
واخر حاجه انا فعلا ضغطى واطىوبحب الشيكولاته جدا
ثانى حاجه اروح ابلغ الى ادانى التاج انى جاوبت عليه
علم وتم التنفيذ
تانى حاجه مطلوب منى اسلم التاج لخمس افراد وبما انى جديده فى التدوين والرئيس اعتزل يبقى اول خمسه تعليقات هما الى يستلموا التاج

الخميس، 24 أبريل 2008

ثورة




يقول النهار


اريد البكاء


اريد العبور


لقلب المساء


اريد الحياه


بغير اكتراث


اريد التنحى


اريد التغلب


على ما اريد


ولكن قلبى


اسير الركود


يقول النهار


لماذا القمر


يناجى المساء؟


ويعشق طيفه


ويهوى النجوم


لماذا اكابد


شمس الظهيره


جفاف الازقه


زحام الضجيج


ضجيج الزحام


اابغى المحال..


اريد السكون


وطير يغنى


وقلب حنون


تراه جنون


تراه انهيار


ام انقلاب


بقلب النهار


ترانى النهار


سارحل يوما


بقلب جديد


واسم جديد


ساعزف لحنا


بغير ازدحام


وغير انكسار


واترك خلفى


رداء النهار

السبت، 19 أبريل 2008

قلب بيتى




بيتى اسمر


قلبه طين


بس.....


طين طيب وصابح


طين غلابه شاقينين


غلب طعمه مر علقم


لازم الصبر معاه
لازم الصبر يا حضره


لجل نقدر ع الحياه


بيتى ارضه مش بلاط


بيتى ارضه عشب اخضر


زى خضار عصفور صغير


لسه مش عارف يطير


الغرير....


فاكر انه راح يطير


فوق جناح الغلب عايش


بس لو طار راح يتوه


قلتله اكسر جناحك


لجل تقدر ع الهروب


من عيون الصيادين


غدارين.... متربصين


بيتى اسمر قلبه طين


لون حيطان بيتى غريب


لونها دم ويا طين


طين غلابه شقيانين


لونها فيه حتة الم


او بكى من غير نواح


فى البراح....


بيتى اسمر قلبه طين


بيتى مفتوح ع السماء


والسماء فيها النجوم


والنجوم نور جوه ضلمه


ضلمه ساكنه قلب بيتى


اللى اصلا هو طين


يعنى ضلمه


جوه ضلمه


ساكنه ضلمه


فى قلب بيتى


اصل بيتى اصله طين